បារាំង និងអង់គ្លេស សាមគ្គីគ្នាលេងការប្រកួតមិត្តភាពបែបកាន់ទុក្ខ
17-November-2015 | ដោយ មួយឡា
ការប្រកួតប្រជែងផ្នែកកីឡាបាល់ទាត់ក្នុងរយៈពេល៩២ឆ្នាំ របស់ក្រុមបាល់ទាត់ជម្រើសជាតិអង់គ្លេស និងបារាំង នឹងឈានចូលទំព័រកើតទុក្ខបំផុតនៅកីឡដ្ឋាន Wembley នារាត្រីថ្ងៃអង្គារនេះ នៅពេលដែលក្រុមទាំងពីររួមសាមគ្គីគ្នា ពោលគឺក្នុងរយៈពេល៤ថ្ងៃ ក្រោយពីការវាយប្រហារភេរវកម្មក្នុងទីក្រុងប៉ារីស។
ការវាយប្រហារកាលពីថ្ងៃសុក្របានដិតដាមក្នុងកីឡាបាល់ទាត់យ៉ាងពិសេស ខណៈដែលគ្រាប់បែកអត្តឃាតចំនួន៣ត្រូវបានបំផ្ទុះឡើងនៅខាងក្រៅ កីឡដ្ឋាន Stade de France ខណៈដែលក្រុមជម្រើសជាតិបារាំង លេងជាមួយនឹងក្រុមជម្រើសជាតិអាល្លឺម៉ង់។
បងប្អូនជីជូនមួយរបស់ខ្សែបម្រើអន្តរជាតិបារាំង Lassana Diarra បានក្លាយជាជនរងគ្រោះម្នាក់ក្នុងចំណោមជនរងគ្រោះទាំង១២៩នាក់ ដែលត្រូវបានសម្លាប់ ខណៈដែលប្អូនស្រីរបស់មិត្តរួមជាតិរបស់គេ Antoine Griezmann បានគេចផុតពីការវាយប្រហារនេះទៅលើសាលតន្ត្រី Bataclan។
ប៉ុន្តែ សហព័ន្ធកីឡាបាល់ទាត់បារាំង (FFF) បានបញ្ជាក់ថា ការប្រកួតនៅរាត្រីថ្ងៃអង្គារនេះ គួរតែដំណើរការទៅតាមការគ្រោងទុក ហើយបច្ចុប្បន្ន ការប្រកួតនេះកំពុងត្រូវបានចាត់ទុកថា ជាឱកាសមួយក្នុងការបង្រួមបង្រួមគ្នា ខណៈដែលយុទ្ធនាការរបស់បណ្តាញសង្គមមួយជំរុញឲ្យអ្នកគាំទ្រ របស់អង់គ្លេសចូលរួមច្រៀងចម្រៀងជាតិរបស់បារាំង នៅមុនពេលចាប់ផ្តើមប្រកួត។
លោក Roy Hodgson អ្នកចាត់ការទូទៅរបស់ក្រុមជម្រើសជាតិអង់គ្លេស បានឲ្យដឹងថា៖ «ការប្រកួតនេះនឹងក្លាយជាឱកាសដ៏ល្អមួយ ប៉ុន្តែ វានឹងបង្ហាញថា ពិភពកីឡាបាល់ទាត់គឺមានការរួបរួមគ្នាក្នុងការប្រឆាំងជាមួយ នឹងអំពើដ៏ឃោឃៅទាំងនេះ។
ខ្ញុំជឿជាក់ថា ក្រុមអង់គ្លេស និងអ្នកគាំទ្ររបស់យើង នឹងបង្ហាញពីសាមគ្គីភាពជាមួយនឹងមិត្តភក្តិបារាំងរបស់យើងនៅ ល្ងាចថ្ងៃអង្គារ និងផ្តល់ការគាំទ្រដល់ក្រុមទាំងពីរអំឡុងពេលដ៏លំបាកនេះ»។ ការប្រកួតនេះ នឹងចាប់ផ្តើមនៅម៉ោង៣ទៀបភ្លឺ (ម៉ោងនៅកម្ពុជា)៕
ប្រភព៖ Channel News Asia , cambosport
ចំនួនអ្នកទស្សនា
- ថ្ងៃនេះ7501
- ម្សិលមិញ12561
- សប្តាហ៍នេះ35451
- ខែនេះ57331
- ឆ្នាំនេះ57331
- សរុប20499787